第 97 屆奧斯卡頒獎獎將於 3 月 3 號上晝喺 ViuTVsix（96 台）直播紅地氈盛況及頒獎典禮。可惜我咁多提名暫時只係睇咗一套Wild Robot，實在冇野好講。不過前幾日睇到數據分析專家 Stephen Follows 分析將近 2000 篇奧斯卡致謝演詞，搵出啲令人驚訝又有趣嘅發現。準備好未？戴上統計學家嘅眼鏡，帶少少八卦心態，跟隨佢嘅步伐，一齊探究奧斯卡背後嘅故事吧。
第一幕：Harvey Weinstein vs God #
講到奧斯卡致謝演詞，坊間有個傳說：Harvey Weinstein 被多謝嘅次數仲多過上帝，當然係講緊 MeToo 運動之前啦。Stephen Follows 分析咗自 1953 年第一場電視轉播奧斯卡以來，總共 1,884 篇得獎演詞。整體數據顯示，上帝被多謝嘅頻率係 4.3%，哈維只有 1.5%。睇落上帝穩坐首位，哈維似乎仲有排追。但咪著，少年，你太年輕了！ 如果將範圍縮小到哈維最風光嘅 1990 同 2000 年代，數據就好玩咗。
喺 1990 年代，Harvey 被多謝嘅頻率高達 5.4%，而上帝係 6.4%，只差 1%！到 2000 年代，哈維回落至 4.5%，但上帝上升到 7%。即係話，哈維喺全盛期真係同上帝勢均力敵，甚至某些年份可能超前！佢靠強勢宣傳同無數獲獎片，硬將自己塞進得獎者嘅感謝名單。不過上帝始終係老牌，根基深厚，哈維再努力都未完全霸榜。
不過佢老人家而家仲受緊紐約州 Mohawk Correctional Facility 受緊 23 碌。跟著仲有加州果 16 碌要分期執行。相信佢餘生都應該會喺監獄渡過，今次真係上帝都救唔到你。
第二幕：真係多謝哂！ #
既然講到多謝，不如睇下奧斯卡得獎者最鍾意多謝邊個。Stephen 嘅數據顯示，最常被提到嘅對象係導演同製片人，這不意外，因為電影係團隊合作，呢啲人往往係幕後嘅核心。具體到個人，又有咩人上榜？
數據話分析指最常被多謝嘅活人（截至分析時仲在世）前幾名係：Steven Spielberg、Harvey Weinstein、George Lucas、Francis Ford Coppola ……呢個名單簡直係好萊塢權力地圖嘅縮影！Steven Spielbery 以導演同製片雙重身份，成為多謝榜冠軍，平均 10 篇演詞有 1 篇提到佢。Harvey Weinstein 排第二，地位顯而易見。
1994 年 Steven Spielbery 憑《舒特拉的名單 Schindler’s List》奪得最佳導演嘅感言：Steven Spielberg Oscars 1994。佢講到感動落淚，多謝咗好多人，真係好有心。
宗教相關嘅多謝其實唔少，尤其 2000 年代達到高峰，有 7%演詞提到上帝或相關概念。1990 年代係 6.4%，1980 年代更低。可能反映左荷里活文化嘅轉變——社會多元化，宗教話題喺公開場合多咗；又或者得獎者想用「多謝上帝」顯得謙虛啲，畢竟同上帝搶功勞唔係人人敢。
第三幕：Peter Jackson vs Sheila Nevins #
講到超越上帝，仲有位值得一提嘅人物 —— Peter Jackson。呢位《魔戒 Lord of the Ring》導演喺 2000 年代憑 9%感謝率，正式成為該年代最常被提到嘅名字，比上帝嘅 7%仲高！回想《魔戒》橫掃奧斯卡嗰幾年，最佳影片、最佳導演，得獎者個個都要多謝呢位紐西蘭大鬍子。睇番 2004 年《魔戒三部曲：王者再臨》攞 11 項大獎嘅片段：Peter Jackson Oscars 2004。真係夠晒震撼！
另一位亮點係女性代表睇 —— Sheila Nevins。佢係 HBO 紀錄片部門嘅傳奇人物，製作過上千部紀錄片，攞咗 31 座艾美獎、42 座 Peabody Awards 同 26 座奧斯卡。佢喺演詞中出現嘅頻率，令佢成為最常被多謝嘅女性。 Stephen 曾經同佢傾電話，佢好謙虛咁話： “我好意外會上榜，但畢竟做咗咁多年。” 呢位低調嘅幕後英雄，證明喺男性主導嘅荷里活，女性一樣可以憑實力出頭。
除咗多謝對象，Stephen 發現奧斯卡演詞本身都有變化。1960 年代，平均一篇演詞只有 40 秒，講完就走，好似趕時間。到今日，時長加到 2 分鐘，足足係當年 3 倍！得獎者唔再淨係話「多謝學院，多謝家人」，而係開始講故事、喊眼淚，甚至搞笑。數據顯示，71%眼淚集中喺 1995 年後，反映好荷里活越來越懂得點樣「演」感言。
例如 Robin Williams 於 1998 年憑《暴雨驕陽 Good Will Hunting》攞最佳男配角：Robin Williams Oscars 1998。就喊到哽咽，多謝咗人生導師同家人，感動到爆燈。
第四幕：And the Oscar goes to #
講到演詞進化，仲有段有趣小典故。傳統以來頒獎嘉賓會用 “The winner is …” 宣布得獎者。 喺 1990 年代末已經開始試用 “The Oscar goes to …” ，到 2000 年漸趨普遍。 同年英國著名演員米高堅（Michael Caine）係第 72 屆奧斯卡憑《心塵往事》，The Cider House Rules 攞咗最佳男配角獎時特別提到有關嘅轉變，並表達咗對同類別提名者嘅敬意，話大家藝術成就都好高，百花齊放，各有千秋，根本冇可能話邊個最好邊個最差，唔應該單純分勝負。佢仲逐一讚揚咗同類別嘅其他提名者，例如 Michael Clarke Duncan 嘅出色演出。睇吓佢當時點講 Michael Caine Oscars 2000)。
尾聲：數據背後嘅人性光輝 #
睇完呢 2000 篇演詞嘅分析，我哋見證咗 Harvey Weinstein 嘅輝煌同沒落，亦睇到荷里活嘅權力結構、文化變遷同人性百態。史匹柏嘅長期霸榜，Peter Jackson 嘅短暫稱王，Sheila Nevins 嘅低調傳奇，仲有重演技上嘅龍爭虎鬥到同行間嘅惺惺相惜。
星期三睇奧斯卡，記得多 D 留意啲感言。邊個被多謝？邊個被忽略？可能嗰幾分鐘，隱藏咗比電影本身更精彩嘅劇情。而我哋觀眾，有幸有 Stephen Follows 呢類數據專家，幫我哋揭開荷里活大製作既幕後真相。
後記：
如果問我邊個係奧斯卡真贏家，我會話係我哋觀眾。邊睇明星喊邊食零食，順便學吓統計學，呢啲娛樂真係難得。多謝 Stephen Follows，多謝數據，當然，仲要多謝……上帝（或者 Harvey？隨你揀啦！）。